رمضان كريم والله اكرم,والزمن الجميل , ومعادله الدخل والمصاريف

هل هلالك شهر مبارك كل عام والامه الاسلاميه بخير
رمضان شهر التسامح وشهر العبادات , ولكن نحن الان فى زمن غير الزمن الجميل( زمن الاجداد) حتى شكل الفوانيس اتغير
فانوس رمضان بعد ما كان بشمعه , اصبح بحجاره وقنوات التليفزيون بعد قناتين فقط اصبحت فضائيات ومئات القنوات
التليفزيونيه , وتقريبا القنوات الدينيه تعد على صوابع اليدين, عكس قنوات الدلع والغناء والرقص , بالاضافه الى القنوات الرياضيه وقنوات الافلام ,اذن كل حاجه اتغيرت وللاسف الى الاسوأ , الاخلاق اتغيرت وانحدرت , الاسعار ولعت, ومظلوم المواطن المصرى
فهو المواطن الوحيد فى العالم الذى تكثر عنده المناسبات سواء الدينيه او الشخصيه ومطالب الا يتخلف عن اى مناسبه والا يكون قد قصر فى حق نفسه او فى حق اولاده واسرته ,فطبعا المناسبات المصريه (اكثر من الهم على القلب), ده شهر رمضان لازمله فلوس علشان الياميش والفوانيس (ابو حجاره طبعا), وطبعا ممكن ان يتزامن الشهر الكريم مع موسم اخر زى موسم المانجو وطبعا كله لازم ياكل مانجو(كيلو المانجو الحلوة 12 جنيه) واثناء شهر رمضان فى الولايم والعزومات (طبعا النهارده عازم حماتى وبكره عازم اخوات المدام وبعد بكره عازم حماى مع ان حماتى وحماى واحد لكن لازم اعزمهم مرتين) وكل عزومه اتعزمها لازم اردها طبعا وتدور الايام ويحل العيد والملابس الجديده وادفع ياراجل ربنا يخليك ليهم وبعدين العيديات ( طبعا عيديات زمان غير عيديات اليومين دول), وجميع اطفال العيلتين لازم نديهم عيديه(اطفال عائله الزوج واطفال عائله الزوجه),ده طبعا غير اهم حاجه واوعى تنسي الكحك والبسكويت والغريبه,وزمان كانت الحاجات دى الزوجه بتعملها (لكن مش بقولكم كل حاجه اتغيرت) لازم الكحك والبسكويت من افخم الانواع واكبر محلات البلد, وبعد العيد فى المدارس ومصاريف المدارس وهلم جرا,واوعوا تنسوا ان فى اثناء المناسبات السابقه لو فى مناسبه فى النص لازم تلتزم بها زى عيد ملاد زوجتى
وعيد ميلاد الاولاد وعيد ميلاد حماتى وعيد الام وسبوع مش عارف مين وجارتنا فلانه جوزها دخل المستشفى لازم نزورهم وطبعا الايد لا يمكن تبقى فاضيه(شوكلاته من افخم الانواع كل واحد ومقامه طبعا) , واليومين دول من الافضل محدش يجيب شوكلاته لحد نظرا للظروف الاقتصاديه ممكن المريض او الشخص اللى حتزوره يطلب منك كيلو لحمه لان الناس مش بتشوفها الا فى المناسبات, طبعا انا بالمناسبه باقترح على الدوله وعلى جميع الشركات الخاصه او التى تتبع الدوله او الهيئات الحكوميه وجميع قطاعات الدوله بالا تمنح الموظف فى نهايه الشهر مرتب وتقوم بصرف كوبونات لحمه وخضار ومصاريف مدارس وعيديات وحتى الفوانيس وزيارات الجيران لجميع انواع المناسبات, المهم مش عاوز اطول عليكم واحب اقولكم كل سنه وانتم طيبين ورمضان كريم وربنا يفك ازماتكم الماديه وتقدروا على مهرجانات المناسبات اللى موجوده فيه مصر وان تحلوا المعادله الصعبه بين الدخل والمصاريف
كل عام وانتم بخير